Noong bata pa ako, excited ako tuwing darating ang Pasko. Kapag naririnig ko na ang mga pamaskong awitin, parang automatic na magiging masunurin ako sa aking mga magulang, mag-aaral nang mabuti at hindi na magiging palaaway. Sa loob-loob ko noon, iniisip ko: Dahil mabait na akong bata, mabibigyan ako ng marami at magagandang aginaldo sa araw ng Pasko. Nakatutuwang magbalik-tanaw sa mga ginagawa kong pag-aabang sa Pasko noon. Nag-eenjoy ako sa mga biyaya. Ang Pasko para sa akin noon ay panahon upang magkaroon ako ng maraming pera, bagong damit, at laruan. Kaya naman, lagi akong excited sa tuwing darating ito. 

Parating na naman ang Pasko. Ngunit bakit kaya hindi na ako kasing excited nang dati? Siguro, dahil sa dami ng kailangan kong gawin bago Disyembre 25, wala na akong panahon para isipin man lang ang araw na iyon. Siguro, dahil wala na akong inaasahang matanggap na pera o bagong damit o magagarang laruan, ang Pasko ay nagiging parang ordinaryong araw na lang sa akin. Siguro, dahil tumatanda na ako, tinatanggap ko na ang Pasko ay para sa mga bata lamang. Siguro, dahil lumalabo na sa akin ang kahalagahan ng Pasko, nawawalan na ako ng gana na hintayin ang araw na ito. Nakalulungkot ang katotohanang hindi na ako kasing-excited gaya ng dati.

Ngunit nabuhayan ako nang binabasa ko ang ating Ebanghelyo sa parating na Linggo. Isinasaad sa Ebanghelyo ang kahalagahan ng paghihintay at paghahanda sa araw ng muling pagbabalik ni Hesus na ating manunubos at Panginoon. Kaya naman ito ang unang Ebangehelyo sa ating Church calendar dahil hindi naman talaga Disyembre 25 ang ating inaabangan kundi ang muli Niyang pagbabalik—isang petsang hindi naman talaga natin alam. Ang Pasko ay ating ipinagdidiriwang dahil masaya nating inaalala na bahagi sa ating mga Kristyano na meron pala tayong hinihintay. Si Hesus ay ipinanganak sa mundo, namatay, inilibing, at umakyat sa langit. Ngayon, buong galak nating hinihintay ang Kanyang pangakong pagbabalik.

Maaari nating tanungin sa ating mga sarili kung ano ba ang nagbibigay sa atin ng excitement tuwing darating ang Pasko? Pero mas mahalagang tanong kung mas excited nga ba tayo sa muling pagdating ni Hesus.

- Bro. Jun-G Bargayo, SJ    

Ano ang bunga ng iyong pagmumuni?

May gusto ka bang ibahagi? Ingles man o Filipino --kahit Tag-lish--

i-share mo na sa ibaba!

Prepare for the rest of the readings this November 28.

Open your bible to:

Or click here for the readings.

 

See you again next week!